فهد الذروي :
كل ما انتهى عهد جددناه *** مثل السنة لا انتهت تبدا
حتى يصل عمرنا منهاه *** حلفت ما اغير المبدا
املا عيوني نظر و اعجب *** من طاغي الزين والاوصاف
واللي بعد هالنظر يتعب *** قلبن معنا عليه اخاف
مستقبلك مطمعي واهداف *** مستقبلي شفتها فيك انت
ابنتظر في علو مشراف *** وانته على راحتك لاهنت
اللي جرى منك قنعني *** خلاني امشي ولا لديت
واللي حقيقة مزعلني *** من بعد ما شفتني صديت
منطق لسانك مؤشر لك *** اما ارتفع مستواط او طاح
والخوف مما حصد تهلك *** والصوت ما ينفع الصياح
دخلـت الشعر مـع باب ن ضمـنت انه ينجّحني
وأخذت ب اطيبه درب ٍ يودي لا انبل الاهداف
أسوِّق اجـود بضـاعه في سـوق الشعْر ترْبحْـني
لان السـيـئه تـبــقى رخـيصـه صـنفـهـا ينـعاف
بيــوت ٍ تحـمـل المـعــنى لـهـا وزنٍ يـرجّـحـني
يـرجّـح وقـفة الشـاعر علـى منـهو سبـقه وناف
احـبّـه حِـبّ مـعـشــوق ٍ يمـسّيـني يصـبّحـني
عطيته وقـتي وفكـري عطانـي قـمّه ومشـراف
ينومس خـاطري لامن سديد الـراي يمـنحـني
علـى بـدع ٍ يشـرّفني شـهاده فالحـياه تضـاف
ولا اسمع فيه من حاول ببعض القول يجرحني
ولـو حـاول يـبـرر لـي بـانـه صـادق وشـفـاف
وانا ما اقبل مـن الخادع بمكر القول ينصحني
ولا لي حـاجة ٍ ب اللـي يصوّر واقعي بخـلاف
يضـيق الكـون في عينه لا جـاله عـلم يفرحني
ولا مـن شافنـي كاسـب تـوارا ما كـأنه شـاف
انا ما اسعى ولا اطلب من احدٍ يوم يمدحـني
ابي لا صرت ب الاول ..ضميره يقبل الانصاف
فهـد الـذروي
ما قويت الحزن في وقت ادّعيه
كيف انا بقواه لو انّه صحيح
شفته بموقف جبرني عشت فيه
شفته ب رِق المشاعر يستبيح
ان فقدتك يالسّعد ويش ارتجيه
غير دمع ن يجبر الخاطر .. يطيح
لو يباع من الفرح كنت اشتريه
ما تثمّن ساعة ن فيها استريح
أبْدِل الحاضر ولا حسّبت ليه
ب اتحدّا ضدّة الوقت الشحيح
و ان كتبت من الحكي كل ما ابيه
جبت حرف ن يوصف الحال الصريح
لو نظرت ب هالبشر تلقى وجيه
وجه طيّب .. فالخفى وجهه قبيح
ما تفيد المكتوي صفقة يديه
ما تطيب جروح من سرّه يبيح
و ان قويت الحزن في وقت أدعيه
كيف انا بقواه يوم انّه صحيح
مير رب الكون ما يخفى عليه
راضي ب حكمه ولو عيني تصيح
فهدالذروي
قالوا حجاب اليوم عقب المرض مات
قلت الأمر لله رب البريّه
نرضى بحكمه والرضى له عبادات
إيمان ب أقداره و نفسٍ رضيه
وان كان فقده من عضيم الصعيبات
لجله شهير ٍ بالعلوم الوفيه
شيخ وعلم في حرب فكاك الازمات
دايم حضوره حل لأكبر قضيه
شاعر كتب في منهج الشعر جزلات
في كل معنى له موارد غنيه
صيته وصلنا رغْم طول المسافات
من طيب ساس ومن مكانه علِيّه
واليوم حنا مثْل كل القرابات
وسمة فراقه للحشا وسم كيّه
نحس باحساس القلوب الحزينات
وشعورهم بالفقد نشعر ب زيه
الحزن في كل الدير له علامات
شرق القصيم و لين غربي (كليّه)
يا الله تغفر له خطايا وزلات
انت الكريم و غافرٍ كل سيّه
واطلبك ترحمنا برحمتك بالذات
اليا سكنّا ف اللحود الخفيّه
ابشروا بالخير و القادم جمـيل
و الـعلــوم الـطــيـبه قـدامـــنا
مـا بقى للجايـحه غـير الـقلـيل
والسعد له موعد ب ايامـــنا
نلتقي ونعـود في منظر مهيل
واقفين صـفوف خـلف امامــنا
في بيوت الله والسقف الظلـيل
بالفـروض الخمس ثم اقيامــنا
ومن ديرنا نطوي الخط الطويل
نحـو مـــكه لابسـين احـرامـــنا
الامـــاني كنـها غــيث ن يسـيل
والدعــا يسبق فطـور صيامـنا
يـاقــوي و يـا عــزيز و يـا وكـيل
طــالبـيـنك نستــعـيد الـيامــنا
يـاكريـم و يـا عظيـم ويـا جليل
نستجيرك مــن عدو ن ضامــنا
فهد الذروي
اتوجه بالنصيحة قبل ما تاتي مطمّه
للعقول اللي تكابر تحْسب الدعوى مزاح
آلكرونا شر جايح و انتشر في كل يَمّه
داهم الفيروس فجأه كل دوله واستباح
والله انّا في خطوره والأمر يحتاج همّه
لا تقول الوضع عادي والبشر ماهم صحاح
االمخالَط والمصافَح كلها عدّن و جمّه
كل من صدّر بعدوى جابها ل أهل المراح
كان ما ناخذ حذرنا ب اهتمام نصيب امّه
و ان فقدنا سيطرتنا ما يعالجنا الصياح
اعتِزِل لا جاك عارض أو تحس ببعض حِمّه
الحجر جوف المنازل ضد فيروسه سلاح
ودي اني في النهايه اختم بكلمه مهمّه
بيت يكفي عن كثيره و اعذروني والسماح
اسمعوا صوت القياده و الوزاره و الأئمّة
كلنا جوف السفينه .. لا تعكسون الرياح
فهد الذروي
جازني بالطيب لا تبخل معي
دامني في الاوّله قدمت طيب
و لا تبدّل موقعك عن موقعي
لو حداك من الزمن أمرٍ صعيب
للعلوم الغانمات اسعى سعي
واغتنم ما ساق ربي من نصيب
النوايا الصافيه هي مرجعي
طبع باقي من شبابي للمشيب
ما يوقِّض فالليالي مضجعي
غير علم ٍيفلج الراس الصليب
و انت ياللي في كلامك تدعي
المراجل شرق وانته في المغيب
الرجاله حسب شوفي تنّعي
في رجالٍ تقصد الشي المعيب
لو ملكت من الدرايه و الوعي
ما تشرّه وانت حادر لك شعيب
الخطا لاصار قلنا مطبعي
وأن تكرر ننكره لنّه مريب
لا تظن أن رحت يذرف مدمعي
ما يهم النفس فقدان الغريب
و الجفا ما ينبش عروق وجعي
والله انّه يشبه علاج الطبيب
ما يحجب النور لا شعشع .. غمام
النهار اجمل من الليل البهيم
ابتسم يالصبح لا زحت الظلام
و أشرقي يا الشمس من تحت العتيم
السهر طوّل طريقه و الكلام
يتكرر بين سين و بين جيم
الليالي كلها نفس النظام
لا جديد .. و لا بقايا ل القديم
اه يا قلب ٍ تولع بالغرام
ابتلاه الود في جوفه مقيم
زاد حزنه محرقه كثر الملام
و الملامه كنها نار الجحيم
الدقيقه في حسابه مثل عام
كيف ليله لا انقضي يصبح سليم؟
يا عيوني لا متى و انتِ صيام؟
من غيابه لا متى جرحك اليم؟
منه جفنك رافض نعاس المنام
صار جافي كنّه معادي غريم
لكن الايام تشبه ل الغمام
جوّها يخْلفه هبات النسيم
ما يدوم الحال .. لله الدوام
ما يدوم الحال و الله الكريم
فهد الذروي
الله يعزك يا الوطن دونك وقوف
الشعب درعٍ لا انطلق سهم صوبك
من اليمن للشام عن حدك سيوف
نحمي شروقك وقت نحمي غروبك
ارواحنا تفداك و العمر مخلوف
العز لا متنا في جبهة حروبك
ياللي حملت سلاح والعقل مخطوف
اثنين يالمقرود والله غدوا بك
في يد عاسف تصبح اليوم معسوف
لعبه سخيفه للعدا يلعبوا بك
تيار حدّر بك بعَد صرت مكتوف
ثمٍ على خط العما سنّدو بك
لو عشت ساعه في ذرى الفقر و الخوف
وقتٍ مضى ما تحتمي فيه ثوبك
ما كنت تجحد من عمل فيك معروف
ما تَتْبع اللي بالخفى غرروا بك
يا اغلا وطن في واجبك ناقف صفوف
ما تسلم اللي بالخيانة نوو بك
ما نحب غيرك يا وطنا ولا نشوف
اغلى من ترابك و لفحة هبوبك
في حكم دوله حكمها الشرع معروف
رجال للعليا بنهجه سمو بك
فهد الذروي
سا مح الله من تحمّل با الخطيه والغلط
طالب ٍ عفو الكريم اللي وسيع المغفره
من تعامل بالجفا مع صاحبه ما ينغبط
تكبر الشرهه على اللي رد باب وسكره
كم من اعمال ٍجليله ماتسجَّل و تحبط
والسبب لن المشاحَن لِهْب نارٍ تسعره
لا اشتعل نار المباغض قِل خيرات وقحط
و لو تولع وسط غابه ما بقى عرق شجره
لا انقطع حبل المواصل ضاع عقده و انفرط
والحقيقة لا تشده أرفق بدق شعره
دام بعض من الخوافي ما الستر عنها انقشط
خلها تمشي عوافي و الامور مستَّره
اعمل بفن التغافل حسب منهاج الوسط
الخطأ من عهد آدم والخطأ يا مكثره
كل قلب ٍ يكتسي ب اللون الابيض انبسط
يغتنم لا زان وقته ب اليال المسفره
سا مح الله من تحمّل با الخطيه والغلط
طالب ٍعفو الكريم اللي وسيع المغفره
أَسْـتِــمِـع للـي لـيـا مـنّـه هــرَج
كـنه يقــدم مـن العجـوه عـذوق
مـايشـوب القـول نقصان وحرج
ناضج المضمون من مبدأ وذوق
و اللسان اللـي علـى الـزله درج
ناتـجه بايـر ولـو للصنف ســوق
العـرج فـي منـطقه يبقى عـرج
لـو تشـوفـه بيـن جلاسـه سبـوق
يحـسب انـه يمـة امجـاده عــرج
والحقيقه:عاكس الخط الضيوق
السعـيد اللـي مـن الدنيا خـرج
مـا لخلق الله علـى متنه حقـوق
والـصّـبـر مفـتاح والـنـيه فـــرَج
طيـبها بـيبـان للقلــب الصـدوق
و الـعـمــل للـه .... للـعلـيا درَج
كل حسنه ترتفــع بالعـبد فــوق
فـهد الـذروي
فهد عبدالمعين الذروي
ليست هناك تعليقات:
إرسال تعليق