الشاعر الخلوق قابل البشري ابو يزيد
خواطر في فن الكسرة للشاعر قابل البشري
بلاك جهّالة القانون
اللي عن الصايبة جهلوا
ان كان سيّبتهم يخطون
وان كان هرجتهم زعلوا
# الجمل
جرّحت قلبي ورحت تنام
جرح الذي ناوي الفرقا
وتركت خلفك اسى وآلام
وعيون في دموعها غرقا
من قال طول البعاد يضر
ماجرّب القرب وجراحه
وآنا الذي بعد ذقت المر
يادووب حسيت بالراحة
ياليتني عن هواك اتوب
نومي من العين طيّرته
لكن حبك قدر مكتوب
اختارني ماتخيّرته
مابينا بعد طاب الود
لا تزرع الشك من حوله
امّا جفا ماله الا صد
ولّا مصافا على وصوله
بحر المثل ميل واسعى به
واحذر تجي للعواتي .. ضد
وقدام لا ترمي الجابه
لا بد تحسب .. حساب الرد
الشعر ماهو شعر محسوب
إمّا يحرّك شعور الناس
يبقي حصيله حبر مسكوب
ثقيل دمّه على القرطاس
...
ياحي ناديت لك مقفين
صُمّان ماتسمع الصوتا
اموات في حسبة الحيين
حيين في حسبة الموتى
معقول !!! ماعندكم علما
عمّا جرى فالفؤاد وصار
صحيح.. من هو يده فالما
ماهو كما اللي يده فالنار
هذي رسالة .. كتبناها
حبر.. وورق.. والمشاعر ظرف
واضح خبرها .. ومعناها
وتقرا غلاها .. من أول حرف
طمّن فؤادك بدون حدود
قدرك على الراس ومعزز
تنهز صم الجبال السود
وانت معزتك ماتنهز
أهل الهوى لو ترد هدّاج
بعد الروى صدّرت ظميا
ما للمودة دوا وعلاج
تبقى جروح الهوى دميا
#الجمل
أُقرب من اللي حقيقتهم
الطيب والعز والنوماس
وأبعد عن اللي طبيعتهم
هرج القفا واغتياب الناس
بعض العرب تحسبه رجّال
عليه فاللازمة تحسب
وهوفالحقيقة صفر وشمال
لاهو خسارة ولا مكسب
اللي يبا راحته يتعب
ابلا تعب ماتجي راحة
واللي لقي راحته يحسب
كل المخاليق مرتاحة
لوكـان صــدك وهجـرانـك
سبـّب أسايـه ومأسـاتـي
تبقـى حبيبـي ونسيـانـك
من سابع المستحيلاتي
يشكي سنين الأسى ملتاع
آهاتها ذوّبت صوته
حتى تمادت به الأوجاع
وصارت حياته كما موته
ج
مليت عين المودة .. ريب
وانت الذي تعرف اسلوبي
وافي .. ولو كان فيّه عيب
غلاك .. من اكبر عيوبي
حلفت مالك علي يمين
كل يوم في ناظري تحلى
ولو تطلب عيوني الثنتين
عليك والله ماتغلى
آنا اعرف أن الجفا مكتوب
وادري ظروف الزمن تحكم
لكن قلبي عليل .. يذوب
افهّمه بس .. مايفهم
#الجمل
دنيا تمرجح كما المرجاح
تصعب على من يحايلها
لا مير مجنونها مرتاح
ولا مير مرتاح عاقلها
مثل المطر جيت في دربي
واسرع من البرق عني رحت
فرحة عمر عشت في قلبي
دمعة غلا من عيوني طحت
..
يامبدي الصد بألوانه
نفسي بعد ودها ملّتك
من بعد ماكان لك خانه
اصبح وجودك كما.. قلّتك
انت وفي ماعليك جدال
ان بيّض الوقت وان سوّد
وانا ليا اقبلت طيّب فال
لكن ليا اقفيت ماعوّد
الفيل يوم ابرهه قاده
ماوصله غايته ومناه
بالعكس ضره ولا فاده
وللحتف والتهلكة وداه
احيان يامقربك مني
قريب قرب الصدى للصوت
واحيان يامبعدك عني
بيني وبينك حياة وموت
صبري نفذ وانتظاري مل
وحالي على حالته لا زال
ماهو صحيح العقد تنحل
بعض العقد مالها حلال
أضحك .. وهمّي معي ساكن
ومن جور الأيام مافرّقت
ماني غريب الوطن .. لكن
محسوب مثلي غريب الوقت
ساهر على ذكريات الحب
ماشع في ظلمتي نورك
وأنت غيابك عليّه صعب
وأصعب من غيابك حضورك
..
ياورد مايل على الاغصان
ميّل على خافقي ميّل
تبغى الصراحة طلعت جنان
فوق الذي كنت متخيّل
عين الهوى نونها مكفوف
عن كل طايف يطوف ابها
واهل الهوى بالقلوب تشوف
وعيونها ماتشوف ابها
اهل الصداقة رجال صقور
تصدق مع اللي يصادقها
واهل المصالح بلا دستور
اللي جمعها يفرّقها
لا تتهمني ضلال وزور
من دون حجة ولا برهان
وآنا وضوحي وضوح النور
لاظلم عليك الظلام يبان
....
تعتب وليّه عليك عتاب
في حكمك اللي تعجلته
لو كان تدري عن الاسباب
ماكان قلت الذي قلته
مادام وصلت لآخرها
ماني مراجعك فاولها
معك الحكاية بقصّرها
وانت معي لا تطولها
احكم على ماترى وتشوف
حرّص وخلّك على طيبك
لا تصير بين العرب مخفوف
كلمة توديك وتجيبك
راح الغلا مايرده شي
ولا ينفع الصوت فاللي فات
والوصفة اللي تداوي حي
ماتحيي الميت اللي مات
اذكرك فالنوم والصحيا
ولا انساك مهما الزمان يفوت
اموت في شوفتك واحيا
واحيا على شوفتك واموت
صابر وفي غيابك الساعات
تقسى عليّه دقايقها
والنفس من شدة اللوعات
حتى النسايم تضايقها
ماينفع الذوق والتهذيب
في شخص ماعنده مروّة
هذا عوج مايجي بالطيب
ينساق بالعنف والقوة
توت وكرز والمخبى خوخ
والرمح مركوز قامتها
ربي خلقها كذا صارووخ
من دمعها لا بتسامتها
لا تعتذر لي من افعالك
عدى زمان الغرام وطاف
تبغاني اصدق اقوالك
واكذّب الناظر اللي شاف
قاومت في حبك الآهات
وأخذت من مرّها شفّي
كنت احسبن الهوى مامات
واثره من العام متوفي
قال المثل يامعنيها
احذر من العاقبة تسلم
ومهما طبيعتك تخفيها
لابد عنها العرب تعلم
طيبك وذوقك وأخلاقك
ترفع مكانتك بين الناس
حتى الذي وده فراقك
لا شاف زولك يدن الراس
طويت روحي بصدك طي
واقفيت من بعد ماحيّت
واصبحت ميّت وغيرك حي
والحي ابقى من الميّت
قلبي تحاكم كما صدام
واخاف يلقى الذي لاقاه
في وقت ماله سنع ونظام
غريب ٠٠فيه الخصوم قضاه
مايزعّل الحق لا قلته
إلا من قلوبهم مرضى
ومن كلمة الحق زعلته
عساه يزعل ولا يرضى
لا يازماني عليه خف
لاتزيدني فوق ماجاني
ولا تراني عطيتك كف
وان زدت لزيتك الثاني
ظالم وجبار من قدك.
مافيه عندك يمين يسار
وصلك دوا والبلا صدك
جنتك جنه ونارك نار
ما للسعادة ثمن وريال
ولا يملك السوق قيمتها
ولو السعادة تجي بالمال
الناس باعت سعادتها
قلبي على حامي الصاجة
وانت وعودك تباعدها
الله يلعن ابو الحاجة
لا جات في غير موعدها
اسكنتني في عيون الشك
وزعزعت فالحب ايماني
وآنا فؤادي وهبته لك
ماهو لهذا ولا الثاني
اسكنتني في عيون الشك
وزعزعت فالحب ايماني
وآنا فؤادي وهبته لك
ماهو لهذا ولا الثاني
أخذْ الحقيقة بدون ألوان
من دون تلعب ولا العب بك
انت فعيني بقايا انسان
ما اكرهك لكن ما احبك
حبي وحبك عقل وجنون
ماله فدنيا الهوى حليا
لا حب ليلى مع المجنون
ولا حب ابو زيد مع عليا
دايم يمين الكريم تمد
ونفسه على الجود مطبوعه
والشح راعيه ماله يد
من مفصل الكف مقطوعه
كامل جروف الهجا اتممت
عيّت معي تشرح الخافي
ما باقي إلّا حروف الصمت
يمكن يجي شرحها وافي
هذا زمنّا غريب اطباع
قل الحيا فيه والشيمه
فيه الذهب صار ما ينباع
والفالصو صار له قيمه
انا احمد الله دموع العين
طرفي على حبسها يقوى
ماتذرف إلّا على ... غالين
ماهو على شي مايسوى
بحر المثل ميل واسعى به
واحذر تجي للعواتي .. ضد
وقدام لا ترمي الجابه
لا بد تحسب .. حساب الرد
ادرى على ودّنا يازين
قدّام في يوم تفقدنا
عشاق فالود حساسين
اقل حاجة تعقّدنا
ماشين في خط لا زالوا
وحنا على خط مازلنا
لا قولنا مثل ماقالوا
ولا قولهم مثل ماقلنا
بيّه هوى فالفؤاد مقيم
عن غير الاحباب ينهاني
حرم علي الصفا تحريم
ناحل كما العود خلاني
مافيه مثلك ولا مخلوق
بينك وبين البشر فارق
الا القمر لا تعلى فوق
يشبهلك الخالق الناطق
قلبٍ تعوّد على الهجران
واستعذب الشوق من يومه
خلوه غافي مع الأحزان
لحدٍ يصحّيه من نومه
الشين مقرود ما ينحب
والزين ينحب بعيوبه
والشين مسكين ماله رب
والزين تغفر له ذنوبه
أشكي أسى من هجوس الود
اللي من البال ماراحت
كلما أقول انتهت ترتد
لا ريحتني ولا ارتاحت
ليلة سهرنا عطيت عهود
أنكرتها ليه ياجاحد
ماني مدوّر عليك شهود
يكفي عليك القمر شاهد
كل المخاليق شافوني
مسجون في نظرة عيونك
ولو ردوا الطرف لعيوني
نفس الحكاية .. يشوفونك
روحي مع الود مغلوبه
عدى عليها الشتا والصيف
والمرء من دون محبوبه
بالله قلي حياته كيف
———
#قابل_البشري
✍️✍️✍️
في جوف روحي ... تربت روح
تجري مع الدم ... وانفاسي
تضحك معي ... وان بكيت تنوح
مافارقت يوم ... هوجاسي
# الجمل
———
#قابل_البشري
✍️✍️✍️
في جوف روحي ... تربت روح
تجري مع الدم ... وانفاسي
تضحك معي ... وان بكيت تنوح
مافارقت يوم ... هوجاسي
# الجمل
ليست هناك تعليقات:
إرسال تعليق