منزالنا في الخبـت سابـق ومن حين
والطيب مبدانا عـلــى كـــل حـالــي
نرعـى الغنـم يـا سيـد حتـى البعارين
مقيالنا مـعـروف فــي حـيـد عـالــي
مـيـرادنــا الـمـقـفـاة و الا الـمـعـايين
وقلات فـي منقـض مـن الـرب حـالـي
والبيـت خيمـة ناصبـة مــن عمـوديـن
وضيوف تنـصـانـا لـصـفـر الـدلالــي
عيشـة هنيـة مـثـل عـيـش السلاطين
الناس مـرتـاحـة و مــرتــاح بــالــي
وفـي الصيـف للقريـة تـرانـا شديـديـن
جيراننا نـعـمـيــن ويـــــا خــوالـــي
والبيت صفة وحوش مبني من الطين
يذري عيـالـي مــن هـبـوب الشمـالـي
مطعومنـا تمـرة و شربـة مــن العـيـن
وعصير للـمـعـزى نـفــت الـحـبـالـي
فينـا الشجـاعـة مــا نـخـاف الثعابـين
فينا جـــلادة فـــي طـلــوع الجـبـالـي
أيــــام دارت مــثــل دور الـطـواحـين
لاكشرة بـأنـيـابــهــا وش بــقــالـــي
والـيـوم فــي البـنـدر تـرانــا مقيـمـين
بعنا النخـل يـا خــوي حـتـى الحـلالـي
والبـيـت فـلـة مـثـل بـنــي الـرواشـيـن
الشمس محجـوبـة بخـلـف الظـلالـي
ومـن بعـد كبـر البيـت صـرنـا بعيـديـن
يا حـسـرتـي حـســراه يـــا هـمـلالـي
إن قلت وينك يـا ولـد قـال فـي الصين
هذي حيـاتـي عـايــشٍ فـــي مـجـالـي
هـذي حياتـي مـن أولــه لـيـن ذلحـيـن
قصة حيـاتـي مسجـلـة فـــي مـقـالـي
وأكـمِّـل الـقـصـة لـكــم بـعــد عـامـين
شلي حصـل فـي دنيتي وش جـرالـي
قـصـة طويـلـة مسجـلـة فــي كتـابين
تروي حـيــاة الـنــاس أول و تــالــي
__________________
ليست هناك تعليقات:
إرسال تعليق