 |
الشاعر بخيتان بن بخيت البشري
|
•••
بوصيك ياللي تستمع للشعر تبغى تستفيد
ركز معي فأبيات معناها رسم منتاجها
اوصيك بالطاعة وصدق القول دربه لاتحيد
والوالدين الوالدين الله يا ماحلا عاجها
واحفظ اللسانك لايضلي بالحكي ساعي بريد
لو ماتصونه ماتطول في علو أبراجها
والطيب سوه والجزاء بعدين والخالق شهيد
ونفسك عن المحذور حاسبها وروحك ناجها
واذا بغيت الشور دور شور من رأيه سديد
واهل المنازل فالعرب تلقى المعارف تاجها
إما بطول البال وإلا الصبر لو ماده بعيد
دنياك لاضاقت ومدخلها غوى مخراجها
بهم الدواء لظروفها بإرادة المولى يفيد
حلمك يسع وهاجها والصبر فيه إفراجها
يلقى البنادم قسمته اما شقي والا سعيد
احدن دجاها يسلكه واحدن سرى بسراجها
ترى ابتسام أيامنا يحتاج له حظٍ حديد
والا بخت يجعل ليالينا تفل حجاجها
المسألة ماهي جهد حتى نحقق مانريد
المسألة توفيق من ربك يزيل احراجها
•••
ياراعي العقل الذهين اسمع لما بعد السلام
اجلس مع رجالن تفيدك لا بدأ منطوقها
واعلم ترى قِل الحكي يغنيك عن كثر الكلام
ولا احدن يبيع الطيبة في سوق ماهو سوقها
وحلم ترى حلم الرجال ارباحها وقت الخصام
واحرص على طيب النبأ واوف الرجال حقوقها
وخلك بعيد الشوح لا ترمي بنفسك فالزحام
ترى العرب عقالها تنبذ فعل مطفوقها
علمن بلا برهان كبه لاتوليه اهتمام
خله سحابة صيف فالبيدا تلوح بروقها
والجار عزه واكرمه لو كان ماهو من كرام
حاول تخيط الطيبة لا بان بعض فتوقها
وخل المقال يليق لا أبديته في منزال المقام
كم يابسة تحيا ليا منك سقيت عروقها
الطيب يثمر لا زرعته لو بعد عشرين عام
يوم الصدور مقفلة ماحدن فتح صندوقها
واللي تجي بالواو تفرق ماتجي حسب النظام
ويدين تصفق فالهوى ويدين دون احلوقها
•••
اقول فاللي ثمن الطيب بالطيب
هذاك بأهل الطيب ساسه مضرى
ماهي غريبة يطلع الذيب للذيب
نعمين من قال الحقايق وقرى
يبقى الوفا باهله على أعز ترتيب
مجنون من كب الثياب وتعرى
الجرح لو يبطي ولا شاف تطبيب
لا يلتئم مرة ولا عاد يبرى
تصيب هقوات الرياجيل وتخيب
ولا خابت الهقوة بها وش تحرى
العاقل اللي مايبى كثر تأنيب
ان ماتجرئ به ضميره . تجرى
حياتنا جملة دروس وتجاريب
من لا اعتبر منها تضيّع وغرى
دربٍ يوصل لا علو المراقيب
ودربٍ بلا مادٍ كما ليل غدرى
عمر الفتى من شبته لازم يشيب
وجرح المشاعر غير عن جرح برى
•••
ادري بتقصيري حوى الصدر داره
وإن العفو لاهل المكارم شهامه
لكن مدري وش صحيح العباره
هي تنّطق والا برمز وعلامه
أعلم بأن الربح عكس الخساره
ولا احدن على نفسه يدوّر ملامه
ادري بأن الليل يسبق نهاره
واعرف بان اللحم يكسو عظامه
وعلمي طريق المُكر ماهو شطاره
وإن الضعافة تعتزي بالرخامه
وحليم حلمه من صفاته وقاره
وإذا غضب إخشى لرمية سهامه
واللي سمع واصدر بحُكمه قراره
يبطل من اللي شاف مجمل كلامه
تبقى الصداره مركز اهل الصداره
ويبقى الهلامه لونفخته هلامه
وقالو تعرف رجال عندك تجاره
وتجارة الاموال مع روزنامه
وإن الفقر فقر العقل وافتقاره
فكرٍ . يعلي هامته فوق هامه
خبير بأن العمر تاره و تاره
والرجل باخلاقه يعلي مقامه
وإن الزمن لابد يعكس مداره
وإن الرخا لو طال إنسى دوامه
•••
أبدا بذكر إللي كلامه لنا اعجاز
في مجمل آيات الكتاب الكريمة
يالهاجس اللي در الأمثال بك حاز
عسى الفرح ربي علينا يديمة
دوم النصيب يصيب مايعطي إيعاز
إن كان خير و كان شر وظليمة
ساق الزمن كسره له الصبر عُكاز
عند الرجال أهل العقول الفهيمة
أهل المثل كل مايقولون ممتاز
وامثالهم فعلاً مثايل حكيمة
حل العقدّ ماهو كما حل الألغاز
وطويق يفرق عن جبال الاديمة
اللي مقابل فوهة الفرن خباز
والطعن في حكم الشرعية جريمة
واللي يحطم رقم يُحسب له إنجاز
ولا ينجب اللي يرتبط في عقيمة
عند العرب مجلس ودكة ومركاز
ولاهي سوى ياهل العقول السليمة
ترى الذهب فالارض والقاز والغاز
والمرجلة تبغى كفاح وعزيمة
اللي مع أهل الطيب بالطيبة فاز
وراع الردى فالناس فوزه هزيمة
الله يحفظ مملكتنا ومن حاز
يلقى النتائج في النهاية وخيمة
الله يرحم شيخ الأمة ابن باز
وخافي قلوب الناس ربي عليمه
•••
يقول من هاضن عليه الهواجيس
ولبتّ حروفه ذايقتّ من قراها
ابن بخـيّت والمعاني قوابيس
ومزونها تمطر وشِعره ثراها
تِنّبت حروفه للمعاجم قواميس
وشكّل بها في لوحته محتواها
سمى بعد بالله تعوذ من إبليس
واللي حوت صدره اللسانه بداها
فاللي بيبحر في مراكب وساويس
بحر الظنون . أحذره غوص ماها
لجل الذي يحدا دروب النواميس
شرهه عليه وقالته ماخفاها
عنها سلك منحى دروب التواعيس
لا طال به ماده جهل عن مداها
حبيت اوضح له مشاعر وأحاسيس
وحبيت ابين له معاني نساها
المسألة ماكان تحتاج تدريس
للي درسها وافتهم ماوراها
كانه معي خمن على غير ماقيس
يحدا اتجاهه يم وجهه عطاها
الحق يبقى ماعلى الحق تدليس
الطيبة ماكل واحد كساها
•••
يالله بذكرك للبداية علامات
ياعالم الساعة وغيب الزماني
ياحي يامخرج من الحي الاموات
ياخالق الأمة بك المستعاني
أخذت لي فالشعر جولة وصولات
وقطفت من طيّب ثماره معاني
نقشت في روس الجزيلات بصمات
لأجيال تقرأ مانطق به اللساني
وجعلت للمفهوم ضبط وسجلات
وأطلقت هاجوس الفكر للعناني
حتى تمثل لي على عذب الابيات
اللي صدها له مع الوقت شاني
وقدام فالحاضر تخوض العبارات
بوقف مع الذكرى على وقت كاني
يوم العرب فيها صفا الذات للذات
يوم البسيطة ماملتها المباني
يوم العُسر برقه سرى الليل مابات
والفقر يرعد في بُطُون الأواني
لضيوفهم ماحالت المستحيلات
ولجارهم وزعة وحشمة وعاني
رغم الجهل رغم الظروف الصعيبات
قليل من عشره تعود ثماني
طالت دروب وقصّرتها المسافات
وقامت رحاتّ الوقت تطحن بأماني
واليوم شوفي مانكر تال الأوقات
وريع العجاف يحد ريع السماني
وقتٍ على تاليه جات العجيبات
اللي منول مالها به مكاني
هذا زمنا والشواهد كثيرات
والعالم الله وش بقى شي ثاني
•••
تكفيني الذكـرى
عشـنـا مــودة مالـهـا حـــد مـحــدود
لا وعد اخذنا مـع بعضنـا ولا عهـود
وإفراقـنـا مـاكــان فـالـبـال مـوجــود
تكفيني الذكـرى مـن أحبـاب غاليـن
مادري وش اللي عكر الجـو تعكيـر
لاهو شكى منـي ولا شفـت تقصيـر
مـكـتــوب راده ربــنـــا لازم يـصــيــر
تكفيني الذكـرى مـن أحبـاب غاليـن
جنـة بـهـا الأثـمـار وأنـهـار وعـيـون
راحت هشيم وفوقهـا عيـون يبكـون
عيا الفرح يبقى من اللي يحسدون
تكفيني الذكـرى مـن أحبـاب غاليـن
كــان الأمــل وطموحـنـا مــا يتـحـدد
وفـي كـل يـوم شعـور فينـا يتـجـدد
ومـن بـعـد ماحلـمـي وحلـمـه تـبـدد
تكفيني الذكـرى مـن أحبـاب غاليـن
الــكــل مــنــا يــرســم الــحــال مــــره
فـيــه الـسـعـادة كـــل سـاعــة تـمــره
والـيـوم بـعـد الـوقـت عـانـيـت مـــره
تكفيني الذكـرى مـن أحبـاب غاليـن
يـالـيـت يـالأيــام مـاشـفــت جــــورك
آلله لـــــو تــدريـــن وش كــــــان دورك
ومن بعـد قلبـي حطمـه لـي غـرورك
تكفيني الذكـرى مـن أحبـاب غاليـن
عـســاه يـذكـرنـي كـمــا مـــا ذكـرتــه
ولـو ماذكـر مـن طيـب خاطـر عذرتـه
لا يانـسـانـيـس الـهـبـايـب شـكـرتــه
تكفيني الذكـرى مـن أحبـاب غاليـن
با اعيش به ذكـرى فباقـي سنينـي
عـســاه متـهـنـي ولا هـــو حـزيـنـي
صعيب لو جيتـه وأصعـب يجينـي
تكفيني الذكـرى مـن أحبـاب غاليـن
•••
تابوت المشاعر
بعض العرب مثل النسم داخل الروح
الروح دونه سترها في كفنها
تحيا معه وإن ينقطع لحظة تروح
ومن الجسد ترحل كما راح عنها
والبعض لاشفته يداوي لك جروح
ومعك جروحه كلبوها دفنها
والبعض جِدك يأخذه هرج ومزوح
وشابت به عزومك بداية زمنها
واللي رصيده شيك بالود ممنوح
مكاسبه من راس ماله ضمنها
درس التجارب للمخاليق مشروح
مثل البضائع سومها في ثمنها
تبقى المودة لأهلها بيت مفتوح
من طبعها تحفظ غلا من سكنها
كيف المشاعر والأحاسيس بتبوح
بالود . كان الروح صده طعنها
لو كان فيها درب الأشواق مسموح
ماصار تابوت المشاعر بدنها
•••
الصوت والصورة معه تكِمل الدور
جات الرسالة والمعاني حكيمات
جتني تعبر عن أحاسيس وشعور
القصة اللي حزنتني فالابيات
ذكرتني . ياللي بك الخير مذكور
يوم القلم حبره يثير العبارات
بحروف يرسمها على ذوق جمهور
لوحة بها نهر الآسى وأرضه آهات
واقع زمن كله متاهات وغرور
فيه المصالح هي أساس العلاقات
وذكرتني صدفة لها سنين وشهـور
بدت وحاضرها معي ماضي وفات
فيها المودة زرع وغصونه زهور
والشوق يلفي كل مرة في باقات
واليوم ذكرى الأمس مظهر وديكور
لأطرئ تخيلت السعد والمسرات
الود له جنة على الارض وبحور
وله نار راعيها جروحه عميقات
•••
لاشفت هقوة تخيب اقول ماهو صعيب
اصفح عن الاولة قدام شوفة فزوع
الصايبة من لبيب والمخطية شي معيب
كلٍ وله منزلة والحر دايم قنوع
إن جاتني من حبيب اقول حبة زبيب
وارميبها قاع بير الود سد الضلوع
وان جاتني من قريب أقول بكرة تطيب
بأصبر عليها وأزيد الوصل ماني قطوع
وان جاتني من غريب أقول شمسه تغيب
لو تشرق اليوم . بكرة مالها من طلوع
وان جاتني ماتثيب يقولها ولد ذيب
الطيبة طيبة والجوع ماسد جوع
احيان جرح ٍ يطيب وجرح ماله طبيب
ماكل من غاب عني انتظر له رجوع
صكات منها نشيّب قبل وقت المشيب
بيت الحزن والفرح كلن يولع شموع
دام المقدّر يصيب اقول هذا نصيب
لو كان من سطوته عيني تهل الدموع
لاشفت وقتي عجيب اقول مهما يجيب
راضين حكم الاله ودوم لأمره خضوع
